የኢትዮጵያ ኤሌክትሪክ ኃይልን ውጤታማ ለማድረግ በየደረጃው የሚገኘው የሥራ መሪ የስልታዊ ኮሙዩኒኬሽን ጽንሰ ሀሳብንና ለተቋም የሚኖረውን ሚና ተገንዝቦ መስራት እንደሚጠበቅበት በተቋሙ የኮርፖሬት ኮሙዩኒኬሽን መምሪያ አሳሰበ።

የመምሪያው ዳይሬክተር አቶ ሞገስ መኮንን ስለ ስልታዊ ኮሙዩኒኬሽን ጽንሰ ሀሳብና አስፈላጊነት እንዲሁም በተቋም ላይ ስልታዊ ኮሙዩኒኬሽን ምን መምሰል እንዳለበት ለተቋሙ የሥራ መሪዎች ማብራሪያ ሰጥተዋል።

ዳይሬክተሩ በማብራሪያቸው የተቋሙ የኮሙዩኒኬሽን ሥርዓት ከርዕይ፣ ተልዕኮ እና ዓላማዎቹ ጋር የተያያዘ መሆን እንዳለበት እና ምን አይነት መረጃ ለማን፣ መቼና ለምን ማስተላለፍ እንደሚገባ ቀድሞ መለየት እንደሚያስፈልግ አስረድተዋል።

ስልታዊ ኮሙዩኒኬሽን ተቋሙን ለማስተዋወቅና ገፅታውን ለመገንባት ከማገዙም ባለፈ ውስጣዊ ግንኙነትን ለማጠናከር፣  በተቋሙ ላይ የኢንዱስትሪ ሰላምን ለማስፈን፣ ከደንበኞች ጋር መልካም ግንኙነትን ለመፍጠር፣ አስተሳሰብን ለመቅረፅ እና ሠራተኛው በተቋሙ በሚተላለፈው መልዕክት ላይ ድርሻ እንዳለው ለማሳወቅ እንደሚረዳ ተናግረዋል።

ተቋሙ የሚፈልገው ለውጥ ላይ እንዲደርስ ስልታዊ ኮሙዩኒኬሽን ከፍተኛ ሚና እንዳለው የተናገሩት አቶ ሞገስ አመራሩም  ሚናውን በመረዳት ማንኛውን ነገር ስልታዊ በሆነ አግባብ ኮሙዩኒኬት ማድረግ ይጠበቅበታል ብለዋል።

በተቋሙ ውስጥ ውጤታማ የሆነ የኮሙዩኒኬሽን ሥራ ለማከናወን መረጃ በወቅቱ የሚገኝበት ሥርዓት ያለመጠናከሩ፣ ከሥራ ክፍሎች፣ ከሚዲያና ባለድርሻ አካላት ጋር  ወጥ ግንኙነት ያለመፈጠሩ፣ ሙያዊ ለሆኑ አንዳንድ ቃላት አቻ ትርጉም ለማግኘት አስቸጋሪ መሆኑ፣ የአመራሮች የሚዲያ አጠቃቀም ግንዛቤ ክፍተት መኖርና የመሳሰሉት ችግሮቹ  እንዳሉ አብራርተዋል።

የተቋም የኮሙዩኒኬሽን ሥራ የአንድ ክፍል ብቻ ባለመሆኑ ችግሮቹን በመቅረፍ ተቋሙን ውጤታማ ለማድረግ ሁሉም የሥራ መሪ የስልታዊ ኮሙዩኒኬሽን ጽንሰ ሀሳብንና ለተቋም የሚኖረውን ሚና ተገንዝቦ በጋራና በቁርጠኝነት መስራት እንደሚኖርበት ዳይሬክተሩ አሳስበዋል።

በዕለቱም ከተቋም ገፅታ ግንባታና ማስተዋወቅ፣ ከተቋሙ ሠራተኞች የማህበራዊ ሚዲያ አጠቃቀምና ተጠያቂነት ጋር በተያያዘ ጥያቄዎችና አስተያየቶች ከተሳታፊዎች ቀርበዋው ምላሽ ተሰጥቶባቸዋል።

በውይይቱ ማጠቃለያ ላይ ሀሳብ የሰጡት የኮርፖሬት ገቨርናንስና ኮምፕሊያንስ ሥራ አስፈፃሚ አቶ ዱጉማ ነዳ በበኩላቸው ተቋሙን ለማስተዋወቅና ገፅታውን ለመገንባት የተቋሙን ስያሜ እስከመቀየር ያሉ የመፍትሔ ሀሳቦች መቅረባቸውን አስታውቀዋል።

ሁሉም አመራር የኮሙዩኒኬሽን ሥራ የተቋሙን ተልዕኮ ለማሳካት የሚኖረውን ሚና ተገንዝቦ መረጃ ከመስጠት ጀምሮ ክፍሉን በአግባቡ መጠቀም እንደሚገባ አሳስበዋል።

? “ንፁህ ኢነርጂ ለተሻለ ህይወት!”