በኢትዮጵያ ኤሌክትሪክ ኃይል የሚከናወኑ ተግባራትና የሚሰጡ ውሳኔዎች ሙያዊ ሥነ-ምግባርን የተከተሉ መሆን እንዳለባቸው የተቋሙ የሥነ-ምግባርና ፀረ-ሙስና መከታተያ መምሪያ ገለጸ።
መምሪያው በ “ሥራ ቦታ ሥነ-ምግባር” (Ethics in the work place) ዙሪያ ለተቋሙ የሥራ መሪዎች በተሰጠው የግንዛቤ ማስጨበጫ ሥልጠና ላይ የመምሪያው ዳይሬክተር አቶ ደረጀ አጥናፌ እንደገለጹት ተቋሙ ከፍተኛ በጀት በመመደብ ሕዝባዊ ጠቀሜታና ኢኮኖሚያዊ ፋይዳ ያላቸውን ትልልቅ ሀገራዊ ፕሮጀክቶችን ይገነባል።
ሥልጠናው አመራሩ በተቋሙ የሚስተዋሉ ከሥነ-ምግባር ያፈነገጡ አሰራሮችን እና አስተሳሰቦችን በመቅረፍ ፕሮጀክቶችን ውጤታማ በሆነ መንገድ በመፈፀም ብሩህ ኢትዮጵያን ለመፍጠር ያለመ ነው ብለዋል።
የራስን ጥቅም በማስቀደም በተቋሙ ጥቅም ላይ መደራደር፣ የተቋሙን ምስጢር አሳልፎ መስጠት፣ የተቋሙን ሀብትና ንብረት አላግባብ መጠቀም፣ የሥራ ሰዓትን አለማክበር የመሳሰሉት የኢ-ሥነ-ምግባርዊ አሰራሮች መገለጫ መሆናቸውን ለአብነት አንስተዋል።
በመሆኑም ተቋሙ ከብክነት በፀዳ መልኩ የተጣለበትን ኃላፊነት በብቃት ለመወጣትና ርዕዩን ለማሳካት በየደረጃው የሚገኘው አመራር ከሥነ-ምግባር ያፈነገጡ ችግሮችን ለመከላከል በቁርጠኝነት መስራት እንዳለበት ገልፀዋል።
ይህም የተቋሙን መልካም ሥም ለመጠበቅ፣ ስጋቶችን ለመቀነስ፣ አቅም ያላቸውን ባለሙያዎች ለመሳብ፣ የሠራተኞችን እርካታ ለማሳደግ እና ጥሩ የሥራ ከባቢን ለመፍጠር ይረዳል ብለዋል።
የኮርፖሬት ገቨርናንሰ እና ኮምፕሊያንስ ሥራ አስፈጻሚ አቶ ዱጉማ ነዳ በበኩላቸው በተቋሙ ሙስናና ብልሹ አሰራሮችን በማስወገድ ሙያዊ ሥነ-ምግባርን ለማረጋገጥ የአመራሩ ሚና የጎላ መሆኑን ጠቁመዋል።
አመራሩ በተቋሙ የሚስተዋሉ ሥነ-ምግባራዊ ጥሰቶችን በማስወገድ ተቋማዊ የሥራ ባህል ለውጥ ለማምጣት የወል ኃላፊነት እንዳለበትም አንስተዋል።
በመሆኑም በተቋሙ የወጡ ፖሊሲዎችን፣ ደንቦችና ሕጎች እንዲሁም የሥነ-ምግባር መርሆችን በማከበር እና በማስከበር በኩል አመራሩ በባለቤትነት ስሜት ኃላፊነቱን ሊወጣ እንደሚገባ አሳስበዋል፡፡
የሥልጠናው ተሳታፊዎች በበኩላቸው በሥልጠናው በተቋሙ ከሚስተዋሉ የሥነ-ምግባር ችግሮች አንፃር ራሳቸውን ማየታቸውንና በቀጣይ በሥራ ቦታ ሥነ-ምግባራዊ መርሆችን በማረጋገጥ ተቋሙ የጣለባቸውን ኃላፊነት ለመወጣት ዝግጁ መሆናቸውን አረጋግጠዋል።
? “ንፁህ ኢነርጂ ለተሻለ ህይወት!”
