በኢትዮጵያ ኤሌክትሪክ ኃይል በየደረጃው የሚገኙ አመራሮች ተቋማዊ ለውጡን በብቃት በመምራት ህዳሴን የመሰሉ ዘመን ተሻጋሪ ሥራዎችን የመስራት የወል ኃላፊነት እንዳለበት የተቋሙ ዋና ሥራ አስፈጻሚ ገለጹ።
በተቋሙ የስትራቴጅክ ዕቅድ፣ በሥነ-ምግባርና ፀረ-ሙስና፣ በለውጥ ሥራዎች እንዲሁም በስትራቴጅክ ኮሙዩኒኬሽን ጉዳዮች ዙሪያ ለሥራ አመራሩ የተሰጠው የሁለት ቀን የግንዛቤ ማስጨበጫ ስልጠና ተጠናቋል።
በሥልጠናው ማጠቃለያ ላይ ሠልጣኝ አመራሮቹ ከመዋቅር፣ ከሥራ ልምድ አያያዝና ከዕድገት፣ ከቅንጅታዊ አሰራር፣ ከኮሙዩኒኬሽን፣ ከብልሹ አሰራር፣ ከግምገማ እና ከተጠያቂነት፣ ከሥራ አፈፃፀም እንዲሁም ከጥቅማ ጥቅም ጋር በተያያዘ ጥያቄዎችንና አስተያየቶችን አንስተዋል።
ሥልጠናው አመራሩ ሚናውን አውቆ የውሳኔ አሰጣጡን በማሳደግ ተቋሙን የሚያሻግሩ ተግባራትን በህብረት ለመስራት የሚያነሳሳ ነው ብለዋል።
መሰል የግንዛቤ ማስጨበጫ ሥልጠናዎች በአመራሩ መካከል ያለውን መግባባትንና ቅንጅታዊ አሰራርን የሚያሳድግ በመሆኑ ቀጣይነት ባለው መልኩ በዕቅድ ተይዞ መሰራት እንዳለበትም አንስተዋል።
በተቋሙ የትራንስሚሽን ቢዝነስ ምክትል ዋና ሥራ አስፈፃሚ ኢንጂነር አንዷለም ሲዓ አመራሩ ለተቋሙ ስኬትና ድክመት ኃላፊነት እንዳለበት አውቆ በቁርጠኝነት በመተጋገዝና በመተጋገል መንፈስ መስራት አለበት ብለዋል፡፡
በተቋሙ የሚከናወኑ ሥራዎች በማስተዋወቅ፣ የአገልግሎት አሰጣጣጡን በማዘመን እና በሥሩ ያሉ ሠራተኞችን በአርያነት በመምራት በኩል ሁሉም አመራር ኃላፊነቱን በአግባቡ መወጣት እንዳለበትም አስገንዝበዋል፡፡
የሰው ሀብት ዘርፍ ሥራ አስፈጻሚ አቶ አታላይ አበበ መዋቅሩ ሥራን ማዕከል ባደረገ መልኩ ተቋማዊ ውጤታማነት ለማሳደግ፣ ሀብትን በአግባቡ ለመጠቀም ታስቦ መሰራቱንና ጥያቄዎች ካሉ በሂደት እንደሚታዩ አንስተዋል፡፡
አመራሩ ሠራተኞችን በተሠጣቸው የሥራ ዕቅድና ደረጃ መሠረት በአግባቡ የመመዘን፣ ሌሎችን የማብቃት እንዲሁም ለሥራ የተሰጠውን ሀብት በአግባቡ የማስተዳደርና የመጠቀም ኃላፊነት በአግባቡ እንዲወጡም ጠይቀዋል፡፡
የተሻለ አፈጻጸም ያላቸውን ሠራተኞችና የሥራ ክፍሎችን ለማበረታታት የሽልማት እና የእውቅና ሥርዓት ተግባራዊ ለማድረግ የቅድመ ዝግጅት ሥራዎች እየተከናወኑ መሆኑን አብራርተዋል፡፡
የተቋሙ ዋና ሥራ አስፈፃሚ ኢንጂነር አሸብር ባልቻ በበኩላቸው እንደገለጹት የ2018 በጀት ዓመት የተቋሙ የግሪድ ስትራቴጂ ትግበራ የመጨረሻው ዘመን መሆኑን ታሳቢ በማድረግ አመራሩ ሥራ ቆጥሮ አቅዶ መስራት አለበት፡፡
አመራሩ ህዳሴን መሰል ዘመን ተሻጋሪ አሻራዎችን ለመስራት በጊዜ የለኝም መንፈስ በመግባባት እንዲሁም የተቋሙን ጥቅም በማስቀደም እና ሥራን ማዕከል በማድረግ ተጠያቂነትን በማስፈን ሊሰራ ይገባል ብለዋል፡፡
ሥራዎቻችንን በአግባቡ ኮሙዩኒኬት ማድረግ አለመቻል አመራሩ ለተቋሙ ያለው የእኔነት ስሜት ላይ ጥያቄ የሚያስነሳ ነው ያሉት ኢንጂነር አሸብር አመራሩ በሥሩ ያለውን ሀብትና ሠራተኛ በብቃት በመጠቀምና በመምራት ለተቋሙ ዘብ መቆም እንዳለበት ገልፀዋል፡፡
በተቋሙ የተፈጠሩ የኮሙዩኒኬሽን ፕላትፎርሞች ሥራን ማዕከል በማድረግ በአግባቡና በሥርዓት መጠቀም አስፈላጉ በመሆኑ ያለው ክፍተት መታረም እንዳለበት አሳስበዋል፡፡
አመራሩ ብልሹ አሰራሮችን በማስወገድ ተቋማዊ ለውጡን በብቃት የመምራት የወል ኃላፊነት አለበት ያሉት ዋና ሥራ አስፈፃሚው መሰል ስልጠናዎችን በማጠናከርና ሕግን የተከተለ አሳታፊ የግምገማ ሥርዓት በመዘርጋት ለተሻለ ውጤት እንዲተጋ ጥሩ አቅርበዋል።
? “ንፁህ ኢነርጂ ለተሻለ ህይወት!”
