ታላቁ የኢትዮጵያ ህዳሴ ግድብ ለኢትዮጵያ ሁለንተናዊ ልማት ወሳኝ ምዕራፍ መሆኑን የኢፌዲሪ ፕሬዚዳንት ታዬ አጽቀስላሴ ተናገሩ፡፡

ፕሬዝዳንቱ በ80ኛው የተባበሩት መንግስታት ጠቅላላ ጉባኤ ላይ ባደረጉት ንግግር የታላቁ የኢትዮጵያ ህዳሴ ግድብ በአዲስ ዓመት ዋዜማ በይፋ መመረቁን አስታውሰዋል፡፡

ግድቡ ከ5 ሺህ ሜጋ ዋት በላይ የማመንጨት አቅም እንዳለው የገለፁት አምባሳደር ታዬ በማገዶ እጥረት ለሚሰቃዩ የኢትዮጵያ እናቶች ኃይል በማቅረብ እፎይታ ይሰጣል ብለዋል፡፡

በተጨማሪም ይህ የኤሌክትሪክ ኃይል ማመንጫ ግድብ የንፁህ መጠጥ ውሃ ተደራሽነትን ለማሳደግ እንደሚረዳም ለጉባኤው አስገንዝበዋል፡፡

የኤሌክትሪክ ኃይል አቅርቦት የሌላቸው ከ60 ሚሊዮን በላይ ኢትዮጵያውያንን የኃይል ተደራሽ ለማድረግ ታልሞ እየተሰራ ሲሆን የህዳሴ ግድብ ግንባታ የዕቅዱ አንዱ አካል መሆኑን ተናግረዋል፡፡

ፕሬዝዳንት ታዬ እንደገለፁት ግድቡ ከሀገር ውስጥ ፍጆታ ባሻገር ለቀጣናዊ የኃይል ትስስርም ጉልህ አስተዋጽኦ አለው፡፡