በኢትዮጵያ የኑክሌር ኃይል ማመንጫ ፕሮጀክት ልማት ዙሪያ በሩሲያ አቶሚክ ኢነርጂ ኮርፖሬሽን(ሮሳቶም) እና በኢትዮጵያ ኤሌክትሪክ ኃይል መካከል የድርጊት መርሃ ግብር ተፈረመ።

የኢትዮጵያ ኤሌክትሪክ ኃይል ዋና ሥራ አስፈፃሚ ኢንጂነር አሸብር ባልቻ እና የሮሳቶም ዋና ሥራ አስፈጻሚ አሌክሲ ሊካቼቭ ፊርማቸውን ባኖሩበት የፊርማ ሥነ-ሥርዓት ላይ የኢፌዲሪ ጠቅላይ ሚኒስትር ዐቢይ አሕመድ(ዶ/ር) እና የሩሲያው ፕሬዝዳንት ቭላድሚር ፑቲን ተገኝተዋል፡፡

የሰነድ ልውውጡን ደግሞ የውጭ ጉዳይ ሚኒስትር ጌዲዮን ጢሞቴዎስ (ዶ/ር) እና የሮሳቶም ዋና ሥራ አስፈጻሚ አሌክሲ ሊካቼቭ አከናውነዋል፡፡

በፊርማ ሥነሰሥርዓቱ ላይ ጠቅላይ ሚኒስትር ዐቢይ አሕመድ (ዶ/ር) እንደተናገሩት በሩሲያ ያደረጉት ጉብኝት የሁለትዮሽ ግንኙነቱን የሚያጠናክር ነው።

ኢትዮጵያ ለሁሉን አቀፍ እድገት የሚውል የኑክሌር ልማት ፕሮጀክት ለመጀመር የረጅም ጊዜ ልምድ ካላት ሩሲያ ጋር ተባብራ ለመስራት ያላትን ቁርጠኝነትም ገልፀዋል።

የኒውክሌር ኃይል የረጅም ጊዜ ልማትን ለማስጠበቅ፣ የኃይል ምንጮችን ለማብዛት እና የኢትዮጵያን አቅም ለማሳደግ አስፈላጊ መሆኑን አንስተዋል።

የሩሲያው ፕሬዝዳንት ቭላድሚር ፑቲን በበኩላቸው በሩሲያ እና ኢትዮጵያ መካከል ያለው የሁለትዮሽ ግንኙነት በተረጋጋ ሁኔታ እያደገ መሆኑን ተናግረዋል።

የሀገራቱ ግንኙነቶች በዘላቂ ሁኔታ እያደጉ እና የንግድ ትስስሩም እየጨመረ ነው ብለዋል።

ሩሲያ በኒክሌየር ቴክኖሎጂ እና በሌሎች መስኮች ያላትን ልምድ ለኢትዮጵያ በማካፈል ለጋራ እድገት በትብብር እንደምትሰራ አረጋግጠዋል፡፡

ጠቅላይ ሚኒስትር ዐቢይ አሕመድ (ዶ/ር) ጳጉሜ 4 ቀን 2017 ዓ.ም የታላቁ የኢትዮጵያ ሕዳሴ ግድብ ምርቃት ላይ የታላቁ የሕዳሴ ግድብን የሚስተካከል ለሰላማዊ ዓላማ ብቻ የሚውል የኒውክሌር ኃይል ማመንጫ ግንባታ በቅርቡ እንደምትጀምር መግለጻቸው ይታወሳል፡፡

? “ንፁህ ኢነርጂ ለተሻለ ህይወት!”