የኢትዮጵያ ኤሌክትሪክ ኃይል የተሸከርካሪ ስምሪት እና ቁጥጥርን ለማዘመን የተገበራቸው የአሰራር ስርዓቶች ውጤት እየተገኘባቸው መሆኑን በተቋሙ የተሽከርካሪ አስተዳደር ቢሮ ገለፀ።

የቢሮው ሥራ አስኪያጅ አቶ ዋለ ታምሬ እንደገለፁት ተቋሙ የተሸከርካሪዎችን ስምሪት ለማሳለጥ እና የቁጥጥር ስርዓቱን ለማዘመን የጂ.ፒ.ኤስ ቴክኖሎጂ ተግባራዊ እያደረገ ይገኛል፡፡

የጂ.ፒ.ኤስ ቴክኖሎጂ ተግባራዊ ከመደረጉ በፊት ተሽከርካሪዎች የመስክ ሥራቸውን ካጠናቀቁ በኋላ ያለ ሥራ የሚቀመጡበት ጊዜ እንደነበር አስታውሰዋል፡፡

ይህም የተሸከርካሪ እጥረት እንዲከሰት በማድረግ የሥራ ክፍሎች  ሥራቸውን በዕቅዳቸው መሰረት እንዳያከናውኑ እንቅፋት ሆኖ እንደነበር አቶ ዋለ ተናግረዋል፡፡

በተሸከርካሪ ስምሪት እና ቁጥጥርን ላይ ያሉ ችግሮችን ለመቅረፍ በአሁኑ ወቅት በተቋሙ ካሉ 1 ሺህ 40 ተሸከርካሪዎች መካከል 500 በሚሆኑት ላይ ጂ.ፒ.ኤስ መገጠሙንም ነው ያስታወቁት፡፡

ተሸከርካሪዎችን በቴክኖሎጂ በመከታተል ሥራቸውን ጨርሰው ሲመለሱ ለሌላ ስምሪት ዝግጁ በማድረግ እና የተቋሙን ሥራ ውጤታማ ለማድረግ የራሱ የሆና አስተዋጽዖ እንዳለው አስረድተዋል፡፡

የጂፒኤስ ቴክኖሎጂው ሥራን ከማቀላጠፍ በተጨማሪ ከዚህ በፊት ከነዳጅ አጠቃቀም ጋር በተያያዘ የነበሩ ችግሮችን በማቃለል ተቋሙን ከተጨማሪ ወጭ እየታደገው ይገኛል ብለዋል፡፡

እንደ አቶ ዋለ ገለፃ ማሻሻያው በአሃዝ የተደገፈ ግልጽ መረጃ ለማግኘት ከማስቻሉም ባለፈ ተሸከርካሪዎች ከተመደቡበት መስመር ሲወጡና ከፍጥነት ወሰን በላይ ሲጓዙ መልዕክት ወደ ማዕከል ያደርሳል፡፡

? “ንፁህ ኢነርጂ ለተሻለ ህይወት!”