ኤሌክትሪክ አንዲት ማብሪያና ማጥፊያ በመንካት ብቻ ወደ ቤታችን አይደርስም!

ከዚያ በስተጀርባ ዓመታትን የሚወስድ ዕቅድ፣ ግዙፍ ኢንቨስትመንት፣ ውስብስብ የምህንድስና ሥራ እና የበርካታ ባለሙያዎች ጥረት አለበት።

ከኃይል ማመንጫ ጣቢያ ተነስቶ ወደ ቤታችን፣ ወደ ፋብሪካችን እና ወደ ሌሎች ተቋማት እስኪደርስ ድረስ ኤሌክትሪክ ረጅምና ብዙ ደረጃዎችን ይጓዛል፡፡ ይህን ጉዞ እና በውስጡ የሚከናወኑትን ዋና ዋና ሥራዎች በአጭሩ እንመልከት።

1. የኃይል ማመንጫ ጣቢያዎች ግንባታ

የኤሌክትሪክ ጉዞ መነሻው ኃይል የሚመነጭባቸው ጣቢያዎች ናቸው። ኃይል ከውሃ፣ ከንፋስ፣ ከፀሐይ ወይም ከከርሰ ምድር እንፋሎት ሊመነጭ ይችላል።

ከፕሮጀክቱ ዓይነትና መጠን አንጻር የመጀመሪያ ጥናት፣ የአካባቢ ተፅዕኖ ግምገማ፣ የፋይናንስ ዝግጅት፣ የግንባታ ሥራና የመሣሪያዎች ተከላ ይከናወናሉ። በውሃ ኃይል ማመንጫዎች ግድብና የውሃ ማስተላለፊያ ፔንስቶክ ግንባታ ሲኖር፣ በንፋስና በፀሐይ ኃይል ፕሮጀክቶች ደግሞ ተርባይኖችና የፀሐይ ፓነሎች ይተከላሉ።

የዚህ ደረጃ የሥራ ጊዜ እንደ ፕሮጀክቱ ዓይነት፣ መጠንና የአፈጻጸም ሁኔታ ይለያያል።

2. የከፍተኛ ቮልቴጅ ማስተላለፊያ መስመሮች ግንባታ

የከፍተኛ ቮልቴጅ የኤሌክትሪክ ማስተላለፊያ መስመሮች በኃይል ማመንጫ ጣቢያዎች የተመረተውን ኤሌክትሪክ በረጅም ርቀት ወደ ማከፋፈያ ጣቢያዎችና ትላልቅ የኃይል ተጠቃሚዎች ያስተላልፋሉ። ለዚህም ግዙፍ የብረት ማማዎች ይተከላሉ፡፡

የመሬት አቀማመጥ፣ የካሳ ጉዳዮች፣ የመዳረሻ መንገድ አለመገንባት፣ የአየር ሁኔታና የመሠረተ ልማቱ ደህንነት የግንባታውን ፍጥነት ሊወስኑ ይችላሉ።

3. የኃይል ማከፋፈያ ጣቢያዎች ግንባታ

የኃይል ማከፋፈያ ጣቢያዎች በኤሌክትሪክ ማስተላለፍና ማከፋፈል ሂደት ውስጥ ወሳኝ ሚና አላቸው። በእነዚህ ጣቢያዎች ትራንስፎርመሮችና ሌሎች የኤሌክትሪክ መሣሪያዎች በመጠቀም ቮልቴጅ ይጨመራል ወይም ይቀነሳል።

ለምሳሌ፡- ከማመንጫ ጣቢያ የሚወጣውን ኃይል ለረጅም ርቀት ለማስተላለፍ ወደ ከፍተኛ ቮልቴጅ እንዲያድግ ሊደረግ ይችላል። በተለያዩ ማከፋፈያ ጣቢያዎች ወደሚቀጥለው የአቅርቦት ደረጃ እንዲጓጓዝ ተስማሚ ወደሆነ የቮልቴጅ መጠን ይቀየራል።

የጣቢያዎቹ ግንባታ የመሬት ዝግጅትን፣ የመሠረት ሥራን፣ የመሣሪያዎች ተከላን፣ የመቆጣጠሪያ ሥርዓቶችን ዝርጋታና የደህንነት ሙከራዎችን ያካትታል።

4. ኤሌክትሪክን ወደ ደንበኞች ማድረስ

ኤሌክትሪክ ከማስተላለፊያ ሥርዓቱ ወደ ማከፋፈያ ኔትወርክ ወይም ግሪድ ከገባ በኋላ ወደ ቤቶች፣ ትምህርት ቤቶች፣ ሆስፒታሎች፣ ንግድ ተቋማትና ፋብሪካዎች የሚደርስበት ሂደት ይቀጥላል።

በዚህ ደረጃ የማከፋፈያ መስመሮች፣ ትራንስፎርመሮች፣ ምሰሶዎችና የደንበኛ የኤሌክትሪክ ቆጣሪዎች ይገጠማሉ። ቮልቴጁም ለተጠቃሚዎች ተስማሚ ወደሆነ ደረጃ ይቀነሳል።

በኢትዮጵያ የኤሌክትሪክ ማስተላለፊያ ሥርዓቱን ተከትሎ የመጨረሻውን የማሰራጨትና የደንበኛ ግንኙነት አገልግሎት በኢትዮጵያ ኤሌክትሪክ አገልግሎት (EEU) በኩል ይከናወናል፡፡

ኤሌክትሪክን አመንጭቶ ወደተጠቃሚው ለማድረስ ስንት ጊዜ ይፈጃል?

ከፕሮጀክቱ ሃሳብ አመንጭቶ እስከ ግንባታ፣ ሙከራና አገልግሎት ማስጀመር ድረስ የሚወስደው ጊዜ በፕሮጀክቱ ዓይነት፣ መጠን፣ የፋይናንስ ሁኔታ፣ የመሬት ጉዳዮችና የግንባታ ሂደት ላይ ይመሰረታል። ትላልቅ የኃይል ማመንጫና የማስተላለፊያ ፕሮጀክቶች ብዙ ዓመታትን ሊወስዱ ይችላሉ። ሆኖም ሁሉም ፕሮጀክቶች ተመሳሳይ የጊዜ ርዝመት አይኖራቸውም።

የኤሌክትሪክ ብርሃን የብዙ ሰዎች የጋራ ጥረት ውጤት ነው!

ከምህንድስና ጥናትና ዕቅድ እስከ ግድብ ግንባታ፣ ከከፍተኛ ቮልቴጅ ማማዎች እስከ የመንደር ማከፋፈያ መስመሮች ድረስ፣ እያንዳንዱ ደረጃ የተቀናጀ ሥራን፣ ጊዜን፣ ገንዘብንና ሙያዊ ብቃትን ይጠይቃል።

ስለዚህ ኤሌክትሪክ ሲበራ የምናየው ብርሃን ብቻ አይደለም፤ ከጀርባው ያለውን የሰው ጉልበት፣ የቴክኖሎጂ አቅምና የሀገር ልማት ጥረትም ማስተዋል ይገባል።

⚡  ኤሌክትሪክ ብርሃን ብቻ አይደለም፤ የትምህርት፣ የጤና፣ የኢንዱስትሪና የኢኮኖሚ እድገት መሠረት ነው!