የኢትዮጵያ ኤሌክትሪክ ኃይል የኮርፖሬት ፋይናንስና ሀብት አስተዳደር ዘርፍ በ2018 በጀት በመጀመሪያው ሩብ ዓመት በገቢ አሰባሰብ እና ወጪ ቅነሳ ላይ ትኩረት አድርጎ ሲሰራ መቆየቱን ገለፀ።
የዘርፉ ምክትል ዋና ሥራ አስፈጻሚ አቶ ደመረ አሰፋ እንደተናገሩት በሩብ ዓመቱ የነዳጅ አጠቃቀምን በጂፒኤስ የአሰራር ሥርዓት በመታገዝ፣ የብቃት ምዘናና ሥልጠናን በራስ አቅም በማከናወን፣ የሠራተኞችን የሰረቪስ ኪራይ በማስቀረት እና የቢሮ መገልገያ ዕቃዎችን ቅድመ ጥገና በማከናወን ወጪ መቀነስ ተችሏል።
ተቋሙ የዕውቅና ሽልማት እንዲያገኙ ዘጠኝ ሠራተኞችን በፈጠራ ሥራ እና 19 በቡድን ሥራ እንዲሁም በሥራ አፈፃፀማቸው ዕውቅና የሚሰጣቸው ሠራተኞችን ለይቶ ለውሳኔ ማቅረቡን ገልፀዋል።
በኢትዮጵያ የትራንስፖርት ዘርፍ የኤሌክትሪክ ተሽከርካሪዎች ዕድገት እያሳየ መምጣት በግሪድ ላይ የሚያሳድረውን ተፅዕኖ የገመገመ የመጀመሪያ የጥናት ረቂቅ ማውጣት መቻሉንም ነው የተናገሩት።
በሩብ ዓመቱ የፕሮጀክት ማኔጅመንት ሥልጠና ከወሰዱ 37 የሥራ መሪዎች መካከል 16ቱ ዓለም አቀፍ የምስክር ወረቀት ሲያገኙ 15ቱ በሒደት ላይ እንዲሁም 6ቱ ውጤት ሳይመጣላቸው መቅረቱን አስረድተዋል።
በራስ አቅም የሚከናወኑ የአቅም ግንባታ ሥራዎች ላይ ስትራቴጂካዊ አመራር መስጠት፣ የተቋሙን የአደረጃጀትና የአሰራር ሥርዓት ማሻሻያ ትግበራ ማጠናቀቅ እና የሰው ኃይል ስብጥር ምጣኔን ማሻሻል እንዲሁም የተቋሙን ስትራቴጂክ ዕቅድ መሰረት ያደረገ የሰው ኃይል ልማት ዕቅድ ማዘጋጀትና መተግበር ትኩረት የሚሹ ጉዳዮች መሆናቸውን አብራርተዋል።
የተቋሙ ዋና ሥራ አስፈፃሚ ኢንጂነር አሸብር ባልቻ በበኩላቸው በአፍሪካ የታዳሽ ኃይል ማዕከል ለመሆንና ትርፋማ ተቋም ለመፍጠር እንዲቻል አመራሩ ከመቼውም ጊዜ በላይ መስራት አለበት።
ከተቋሙ ገቢ፣ ከሠራተኞች እርካታና ለሥራ መሰጠት፣ ከአመራር ቁርጠኝነት እና ከመረጃ ጥራት ጋር ተያይዞ የሚስተዋሉ ክፍተቶችን ማረም እንደሚገባ አሳስበዋል።
እንደ ኢንጂነር አሸብር ገለፃ የተቋሙን ገቢ ከማሳደግ አንፃር የኃይል ሽያጭ የሜትር ንባብን ከሰው ንክኪ የፀዳና በዘመናዊ የአውቶሜሽን ሥርዓት የታገዘ ለማድረግ የተጀመሩ ሥራዎችን በየጊዜው መፈተሽ ይገባል።
ከአበል እና ነዳጅ አጠቃቀም ጋር ተያይዞ የሚታዩ የአሰራር ክፍተቶችን ለማረም ዘርፉ አፋጣኝ እርምጃዎችን መውሰድ እንዳለበት ተናግረዋል።
የተቋሙ ሠራተኞች በቁርጠኝነትና በጊዜ የለኝም ስሜት እንዲሰሩ ለማስቻል አመራሩ የክትትልና ድጋፍ ሥራዎችን አጠናክሮ ማስቀጠል አለበት ብለዋል።
? “ንፁህ ኢነርጂ ለተሻለ ህይወት!”
